മോൺട്രിയാലിൽ കൊല്ലപ്പെട്ട സർക്കാർ ഉദ്യോഗസ്ഥയ്ക്ക് ആദരമർപ്പിച്ച്  നേതാക്കൾ; അപലപിച്ച് പ്രധാനമന്ത്രി മാർക്ക് കാർണി

 

മോൺട്രിയോളിൽ കാനഡ റെവന്യൂ ഏജൻസി ഉദ്യോഗസ്ഥയായ ലൈലാ ബെൻ സേലം (45) ക്രൂരമായി കൊല്ലപ്പെട്ട സംഭവത്തിൽ പ്രമുഖ കനേഡിയൻ രാഷ്ട്രീയ നേതാക്കൾ ആദരാഞ്ജലികൾ അർപ്പിച്ചു. ഹൗസ് ഓഫ് കോമൺസിൽ സംസാരിക്കവെ പ്രധാനമന്ത്രി മാർക്ക് കാർണിയും പ്രതിപക്ഷ നേതാവ് പിയറി പൊയിലീവ്രെയും കൊല്ലപ്പെട്ട ഉദ്യോഗസ്ഥയുടെ കുടുംബത്തോടും സഹപ്രവർത്തകരോടും അനുശോചനം അറിയിച്ചു. രാജ്യസേവനത്തിൽ ഏർപ്പെട്ടിരുന്ന ഒരു പൊതുപ്രവർത്തകയ്ക്കുണ്ടായ ഈ ദാരുണാന്ത്യം കനേഡിയൻ സമൂഹത്തെയും ഔദ്യോഗിക മേഖലയെയും ഒരുപോലെ ഞെട്ടിച്ചിരിക്കുകയാണ്.

മോൺട്രിയോളിലെ വില്ലെ-മാരി പ്രദേശത്തുള്ള സ്വന്തം ഫ്ലാറ്റിൽ വെച്ച് സഹപ്രവർത്തകനുമായി വെർച്വൽ മീറ്റിംഗിൽ  പങ്കെടുത്തുകൊണ്ടിരിക്കെയാണ് ലൈലാ ആക്രമിക്കപ്പെട്ടത്. വിവരം അറിഞ്ഞ് പോലീസ് എത്തിയപ്പോഴേക്കും  ഗുരുതരമായി പരിക്കേറ്റ അവർ മരിച്ചിരുന്നു.  ക്രൂരമായ ഈ കുറ്റകൃത്യത്തിന് പിന്നിലുള്ള ആളെ നിയമത്തിന് മുന്നിൽ കൊണ്ടുവരാൻ പോലീസ് അന്വേഷണത്തിന് ആവശ്യമായ എല്ലാ പിന്തുണയും സർക്കാരിന്റെ ഭാഗത്തുനിന്ന് നൽകുമെന്ന് പ്രധാനമന്ത്രി ഉറപ്പുനൽകി.

കേസുമായി ബന്ധപ്പെട്ട് സംശയമുള്ള ഒരു വ്യക്തിയുമായി പോലീസ് സംസാരിച്ചിട്ടുണ്ടെങ്കിലും നിലവിൽ ആരുടെയും അറസ്റ്റ് രേഖപ്പെടുത്തിയിട്ടില്ല. സംഭവത്തെ അതിശക്തമായി അപലപിച്ച ടാക്സേഷൻ എംപ്ലോയീസ് യൂണിയൻ, കൊല്ലപ്പെട്ട ബെൻ സേലത്തിന്റെ കുടുംബത്തിനും സഹപ്രവർത്തകർക്കും പിന്തുണ പ്രഖ്യാപിക്കുകയും ആവശ്യമായ കൗൺസിലിംഗ് സഹായങ്ങൾ ഏർപ്പെടുത്തുകയും ചെയ്തിട്ടുണ്ട്. കാനഡയിൽ പൊതുപ്രവർത്തകർക്കും സ്ത്രീകൾക്കും എതിരെയുള്ള അക്രമ സംഭവങ്ങളിൽ ശക്തമായ നടപടി വേണമെന്ന് വിവിധ സംഘടനകൾ ആവശ്യപ്പെട്ടു.